Sunday, August 21, 2016

විවිධ හේතු නිසා මම කැමති වන; කැමතිම ගීත 12

සංගීතයට බොහෝ මිනිසුන් ප්‍රිය කරති. මා හට බ්ලොග් ලිවීමට මුලින්ම යෝජනා කල ඉයන්ගේ අඩවිය නමැති බ්ලොග් පිටුව මගින් කැමැති ගීත 10 තේරීමට ගොස් කැමති ගීත 16ක් තෝරා තිබුණි. ඔහුගේ අභියෝගය බාරගත් වෙනත් බ්ලොග් කරුවන්ද තමන් කැමති ගීත ගැන ලියා තිබුණි. ඒවා කියවන විට මම අසා නොතිබූ ගීත වෙතද, අසා තිබු නමුත් යම් කලෙක ආකර්ශනයක් ඇති නොවූ ගීත වෙතද නවමු ආකර්ශනයක් ඇති විය. බ්ලොග් ලිවීමේදී වැදගත්ම පුද්ගලයා වන්නේ ලියන ඒවා කියවන්නා බව සිතන බැවින් කියවන්නාගේ කාලයේ වැදගත් කමට ගරු කරමින් ලිවීමට කියවීමට තරම් වැදගත් යමක් ලිවීම මගේ ස්ථාවරය බැවින් මගේ පුද්ගලික කැමති අකැමති දේ ගැන හැකි පමණ අඩුවෙන් ලිවීමට සිතුවෙමි. කෙසේ වෙතත් කැමති ගීත සම්බන්ධ කරුණේ දී අන් අයගේ කැමති ගීත ඇසීමෙන් ලුත් යමක් දැනගත් බැවින් මම කැමති ගීත ගැනද මෙසේ සටහනක් තබමි. පහතින් සදහන් වන්නේ මම කැමති ගීත ද ඒවාට කැමති වීමට හේතුවූ අදහස් සහ අත්දැකීම් වේ.

01. දසිස් දිනා රුපු රජුන් නසා

මගේ අදහස නම් මෙම ගීතයෙන් කියවෙන අදහස් අතර, දීර්ඝ කාලීනව ලුහුබැඳ යමක් ලබාගැනීමෙන් පසුව සිතට ඇතිවන හිස් බව ගැනද ලියවී ඇති බවයි. එහි මනෝවිද්‍යාත්මක පසුබිම එතරම් නොදන්නා නමුත් එය ඉතා සංකීරණ සිතුවිල්ලක් බව පෙනේ. නවීන ලෝකයේ උත්සුකව ජීවත්වන අපි අරමුණු ලුහු බදින්නන් වෙමු. මා කුඩා සිසුවෙකු කල සිට ලුහුබැඳ ගියේ අධ්‍යාපනයයි. මුලික උපාධියේ අවසන් විභාගයේ අවසන් ප්‍රශ්නපත්‍රය ලියන විටද, වෙනත් සැලසුමක් මා සතුව නොතිබුණි. උපාධියේ සියලු විභාග සාර්ථකව අවසන් කිරීමෙන් පසුව මට දැනුනේ දීර්ඝ කාලීනව ලුහුබැඳ යමක් ලබාගැනීමෙන් පසුව සිතට ඇතිවන හිස් බවයි. ඒ ගැන කියවෙන මේ ගීයට මම බොහෝසෙයින් ප්‍රිය කරමි. 

අදින් මතුව යලි සටන් වදින්නට රජෙක් නොමැති සිහ අසුන් අරා,
සුසුම් නලින් මිස සිතින් බෑර නොව හිදීම් මගේ දුක කිරුළ දරා !!





මගේ ජීවිතයේ මුහුණ දුන අවසාන අධ්‍යාපන පරීක්ෂණය වූ ආචාර්ය උපාධියේ අවසන් විභාගයෙන් පසු මට කිසිදු හිස් කමක් නොදැනුනේ හැගීම මත තීරණ ගන්න මිනිසා වෙනුවට ඒ වනවිට මා තුල සිටියේ තර්කනය මත තීරණ ගන්නා මිනිසෙකු නිසා බව සිතමි. තරඟකාරීව අරමුණු ලුහුබැඳ ගොස් ලබන්න ගන්නා ජයග්‍රහණ සමග ලැබුන සතුරන් ද එලෙසින් පිළිගැනීමේ ශක්තිය මිනිසෙකුට ඉතා වැදගත් බව මම සිතමි.

02. සුනිල්වන් නුවන් යුග වසා උතුර උතුරා

මේ ගීතයේ කියවෙන්නේ දරුවන්ගේ ප්‍රේමයට එරෙහි වන දෙමවුපියන් වෙත දරුවන් විසින් කෙරෙන ආයාචයකි. දරුවන්ගේ ප්‍රේමයට එරෙහිවීම කුල ගෝත්‍ර, පරම්පරාවෙන් එන මිල මුදල් හෝ නොදන්නා ජෝතිෂ්‍ය අනාවැකියක් නිසා විය හැකිය. තම කාලයද මිල මුදල්ද කැප කරමින් දරුවන්ට උගන්වා ඔවුන් උපාධිදාරීන් පශ්චාත් උපාධිදාරීන් බවට පත් කල පසුත් දරුවන්ට තම ජීවිතය ගැන නිවැරදි තෝරාගැනීමක් කල හැකි යයි දෙමවුපියන්ට විශ්වාසයක් නොමැති නම් එය ඛේදවාචකයකි. එක්කෝ එය අපේ අධ්‍යාපන ක්‍රමයේ අසාර්ත භාවය පෙන්වන හොඳ උදාහරණයකි. එසේ නොමැති නම් දකුණු ආසියාව තුල දෙමවුපියන් දරුවන්ගේ පුද්ගලිකත්වයට අනවශ්‍ය ලෙස මැදිහත්වීම මනාව පෙන්වන එක් අප්‍රසන්න උදාහරණයකි.

සැනසී හිදින්නේම්ද ඇගෙ දුක බලා දැන්,
සුව සෙත පතා දෙන්න ආසිරි දයාවෙන් !!

යනුවෙන් කෙරෙන්නේ ඉල්ලීමක් වුවද;

මගේ ජීවනේ ගීයේ ඇගෙ හඬ නොවේ නම්,
හද වෙනෙහි සත්සර සදා ගොළු වුණා දෙන්!!

යනුවෙන් මේ ගීතයේ දැක්වෙන්නේ දෙමවුපියන්ට කෙරෙන එක්තරා තර්ජනයක්ද විය හැකිය.

දරුවන් හැදිය යුත්තේ ඇයිද යන්න පැහැදිලි වැටහීමක් නොමැතිව අනුන් දරුවන් හදන නිසාත්  ජීව විද්‍යාත්මකව  දරුවන් හදන්නට හැකියාව ඇති නිසාත් දරුවන් හැදු දෙමවුපියන්ට හොඳ පණිවුඩයක් මෙම ගීතයෙන් සපයන බව මම සිතමි. දරුවන් යනු දෙමවුපියන් වැනිම මිනිස්සු මිසක් දෙමවුපියෝ සතුටු කරන්නට බැදී සිටින සත්ව කොට්ටාශයක් නොවෙති. දරුවෝ හැදිය යුත්තේ මිනිසෙක් වශයෙන් ඉපදී ජීවත් වීමට අපිට ලැබුන අවස්ථාව තව කෙනෙකුට ලබාදීමේ යුතුකම සහ වගකීම නිසාම මිසක්, අපේ බලාපොරොත්තු දරුවෝ ලවා ඉටුකරගැනීමේ අභිලාෂයෙන් නොවෙන බව මගේ සිතිවිල්ලයි.

මම මේ තත්වයට මුහුණ දුන්නේ ප්‍රේමය සම්බන්ධව නොව මගේ උසස් අධ්‍යාපනය සම්බන්ධයෙනි. මගේ පවුලේ උගත් සාමාජිකයන් මම දර්ශන විශාරද උපාධියක් හදාරනවා දකින්නට එතරම් කැමති නොවුහ. ඔවුන්ට වුවමනා වුයේ මම ඔවුන් වැනි සීමාසහිත දෛනික රාමුවකට කොටුවූ රාජ්‍ය සේවකයෙකු වී සිටිනු දැකීමයි. මගේ පුද්ගලික ස්වාධීනත්වය සෑම විටම අංක එකට තබන මම; මගේ තේරීම නිවැරදි බව සිතමින් සියලු අභියෝග වලට මුහුණ දෙමින් පැමිණ සාර්ථක වුයෙමි.




උගත් වැඩිහිටි දරුවන්ගේ තීරණ වලට අනවශ්‍ය ලෙස ඇඟිලි ගසන දෙමවුපියන්ට හොඳ පණිවුඩයක් මෙම ගීතයෙන් දෙන බව මම සිතමි. මම ඊට ප්‍රිය කරමි.


03. නගර-ගව එන්කා

දර්ශන විශාරද උපාධිය හැදෑරීමට මම පැමිණියේ ජපානයටයි. ජපානයේ සංස්කෘතික අංගයන්ට මෙන්ම ජපන් සංගීතයටද මම ඇලුම් කරමි. එන්කා (enka) නමැති සම්භාව්‍ය ජපන් ගීත විශේෂයට මම ඉතා ප්‍රිය කරමි.  මම ප්‍රිය කරන ඉංග්‍රීසි උපසිරසි සහිත එක් එන්කා ගීතයක් මෙහි දක්වමි. එහි කියවෙන්නේ "උකයි" යනුවෙන් හැදින්වෙන, කුරුල්ලන් යොදාගෙන මාළු ඇල්ලීමේ ක්‍රමයට ඉතා ප්‍රසිද්ධ ජපානයේ ගිෆු පළාතේ "නගර ගව" නම් නදිය ආශ්‍රිතව සංචාරයට එන සංචාරකයෙකු සහ තානායමක සේවය කරන තරුණියක අතර ඇතිවෙන එක් රැයකට සීමා වූ ප්‍රේමයකි.






"උකයි" ක්‍රමයට මාළු ඇල්ලීමට මෙන්ම මෙම එන්කා ගීයටද මම බොහෝ සේ ප්‍රිය කරමි.  

04. Every night in my dreams


1990 දශකයේ අග භාගය වන විට අපේ රටේ ජනප්‍රිය වූ ඉංග්‍රීසි චිත්‍රපටයක් වන ටයිටැනික් චිත්‍රපටයේ අඩංගු මෙම ගීතය එවකට නවයොවුන් වියේ සිටි අපට ප්‍රේමය පිලිබඳ මුල්ම හැගීම් දැනවූ ගීයකි. මම ඊට බොහෝ සේ ප්‍රිය කරමි.



කෙසේ නමුත්, අදටද මම වඩාත් ප්‍රිය කරන්නේ සිංහල ගීත වලටයි. මම කැමති සිංහල ගීත ඇසීමෙන් මම බොහෝ සේ සතුටු වෙමි. නමුත් මම සංක්‍රමණය වී සිටින තෙක්, මට දරුවන් සිටින දිනෙක ඔවුන්ටද සිංහල ගීත ඇසීමෙන් ම‍ම ලබන සතුට ලැබිය හැකි බවක් මම නොසිතමි. මෙය පළමු පරම්පරාවේ සංක්‍රමණිකයන් ප්‍රවේශමෙන් සිතිය යුතු කරුණකි.


05. ඔබ එන්න ඔබ ඇවිත් යන්න එන්න


නවයොවුන් වයසට එන විට ප්‍රේමය යනු හැමටම දැනෙන සුන්දර අත්දැකීමක්. මට ඒ හැගීම දැනෙනකොට මම පාසලේ 8 වසරේ ශිෂ්‍යයෙක්. එක ඇතිවෙලා නැතිවෙලා ගිය හැගීමක් නොවුන වසර 3ක පමණ ප්‍රේමයක්. ඇයත් මමත් පාසල් ගියේ එකම පාසල් වෑන් රථයක. කතා කරන්නත්, ටිකක් ලග හිටියොත් සුවඳ විඳින්නත්, උපරිම වශයෙන් අතින් අල්ලනත් එහාට නොගිය මේ ප්‍රේමනීය හැගීම් එක්ක තමයි ළමයින් වුන අපි තරුණයන් බවට පත්වෙන්නේ. එකදවසක් ඉස්කෝලේ ගිහින් ඇවිත් හවසට ගෙදර වැඩ ඉවර කරලා සෙල්ලම් කරලා ඇවිත් ගෙදර තිබෙන නිස්කලංක පරිසරයේ ඉදගෙන ඇය ගැන හිතන මොහොතක දී ගුවන් විදුලියේ ජාතික ක්‍රීඩා විකාශනයේ ඇසුන මේ ගීතය ඇසෙන විට මට අදටත් දැනෙන්නේ වචන වලින් විස්තර කරන්න අපහසු අතරමං වුන හැගීමක්.

සත්තකයි මම ඔබ එතැයි සිතුවා   !!


මිනිසුන් ජීවත් කරවන්නේ බලාපොරොත්තුව බවයි මම හැමදාම විශ්වාස කරන්නේ.

06. මුළු හදින් මම ඇයට පෙම් කර


ඇය මට ආදරය කලාද නැතිද කියන කියන එක අදටත් පැහැදිලි නෑ. ඇය එකල පිරිමි ළමුන් බොහොම දෙනෙකුගේ පුදුම ආකර්ෂණයකට ලක්වුණ ගැහැණු ළමයෙක්. ඒ නිසා ඇයගේ ආදරය තමුන් දිනාගත් බව වෙනත් අය ඇවිත් කියන එක බොහොම සුලබ බොරුවක් බව මමත් මගේ යාළුවොත් දැනගෙන හිටිය. මේවගේ දේවල් වලට නව යොවුන් තරුණයන් අතර ඇතිවෙන සුළු ගැටුම් බොහොම සාමාන්‍ය දේවල් විදියට මම දකින්නේ. ඇත්තටම කිව්වොත්, දුර්වල පෞර්ෂයක් තිබුන ළමයෙක් වුන මම තරුණයෙකු වන විට ජීවිතේ බොහෝ අභියෝග වලට මුහුණ දෙන්න ඉගෙනගත්තේ මේ දේවල් තුලින්. මම සාමාන්‍ය පෙළ විභාගයට මුහුණ දුන් අවුරුද්දේ එක පාසල් නිවාඩුවක අපිට විද්‍යාව අමතර පන්තියක් තිබුන අපේ පාසලේ. ඇයගේ පාසලෙත් එවැනි පන්තියක් තිබුන නිසා ඇයත් නිවාඩු කාලේ නගරයට ආවා. එක දවසක් අපිට අවුරුදු කිහිපයක් වැඩිමල් යාළුවෙක් මට කතා කරලා කිව්වා ඔහු ඇයගේ අදාරය දිනාගත් බව. එහෙම කතා අනන්ත අහපු මම ඒක එතරම් ගණන් ගත්තේ නැති වුනත් පැයකට පමණ බස් නැවතුමේ හිටි පසු මම දැක්කේ බස් රථයක ඇයත් ඔහුත් අත් අල්ලගෙන යන හැටි. මට කරන්න තිබුන එකම දෙය ඇය ඔහුට අයිති වෙන හැටි බලාසිටින එක. මගේ වටේ තිබුන මුළු ලෝකයේ සියලු දේ විනාශ වෙලා ගිහින් මමත් මට අනුකම්පා කරන යාළුවො කිහිප දෙනෙකුත් පමණක් ඉතුරු වුන බවයි මට ඒ වෙලාවේ දැනුනේ. 

එදා රෑ ගං ඉවුර අසබඩ සුපුන් සඳ පායන වෙලාවක,
කතා කී හැටි මතක් වෙනකොට දුක දැනෙයි පවතින අපායක !!




ඒ වෙලාවේ දැනුන හැගීම  මට අදටත් අපැහැදිලියි. වසර ගණනාවක් ගියත් බොහෝ දේවල් අමතක කරන්නට බැරි කෙනෙකු වෙන මගේ මතකයේ තවමත් ඒ මතකය තිබෙනවා. මේ ගීතයට මම කැමති වෙන්න එය එක හේතුවක්.  

07. දිය වෙන්නට පෙර හෙට උදයේ හිම ජීවිතේ


මගේ මතකයේ හැටියට මේ ගීතය ගායන කරන කලේ අප්සරා ද සිල්වා පාසල් ශිෂ්‍යාවක්. ගීතය නිර්මාණයේදී බොහෝ වැඩ කොටසක් කර තිබුනේ පාසල් සිසුන් බවයි මගේ මතකය. සිංහල ගීත සාහිත්‍යයේ බිහිවුන වෙනස් විශිෂ්ඨ ගීතයක් වෙන මෙය අමතක නොවෙන ගීයක්. අප්සරා ද සිල්වා බොහෝ ගීත ගායනය කර තිබෙනවා ද යන්න මට ගැටළුවක්. 

හිනහ වෙවී අපි නැටුවට පොලවට වෙහෙස දැනෙනවාද,
කදුලැලි දහඩිය ගැලුවට මහ කළු ගල් දියවෙනවාද,
එනමුදු ඔබගේ බැල්මට කාගේ හදවත වාවයිද,
සිත ගිම් නිවන්න ඔබගේ යස උරහිස දෙනවාද,
ඉවාන් පවුලුශා !!





08. මේ ගඟ මේ දුරු කතර ගෙවා

එච් එම් ජයවර්ධන ශුරීන්ගේ තනුවල තිබෙන ශක්තිය හරිම වෙනස්. මේ ගීතයට ඔහු නිර්මාණය කල තනුව හරිම පුදුමයි. මේ ගීය අහන විට මට හිතෙන්නේ මේ තනුව ගඟක් ගලායන සුමට රළු අවස්ථා පසු කරමින් යන බවයි. මගේ මිතුරෙකුත් සමග එක්වී මෙම ගීතයේ තනුවට ගණිතමය මොඩලයක් නිර්මාණය කරන්න උත්සාහ කලත් එය කිරීමට අපහසු වුනා.




මේ හැටි දුර පියමන් කරලා ඇයි මම ඔබ ළඟ නතර වුණේ!

අවංක අදාරණීය හඬකින් එය ඔබ වෙනුවෙන් අසන්නට ලැබෙනවා නම් ඔබ වාසන්වන්තයෙක් බවයි මම සිතන්නේ.  

09. ඔබ දුටු ඒ මුල්දිනේ

මේ ගීතය බොහෝ පැරණි එකක් වුවත් ජනප්‍රිය වුණේ මෑතකදී බවයි මම හිතන්නේ. ප්‍රේමවන්තිය මුලින්ම මුණගැහුණු දිනය බොහෝ දෙනෙකුට විශේෂ මතකයක්. මම මේ ගීතයට කැමති වන්නට අනෙක් හේතුව වන්නට හැකි වන්නේ සාදයකදී මට එය ඉතා පහසුවෙන් ගායනය කිරීමට ඇති හැකියාව නිසා බවත් මම හිතනවා.

නෙත් යුග මා දෙස යොමා මගේ මියුලැසියේ කුමක් කියන්නටද සැරසුනේ !!





10. විනේ කටින උන් තරහක් නොකියාම

අපේ රටේ සංස්කෘතිය තවම බොහොම සංවෘත එකක්. එහිදී වැන්දඹු කාන්තවන් බොහෝ සෙයින් අසරණ වෙනවා. ළඟදී අහන්ට ලැබුනේ ඇඹිලිපිටිය පොලිසිය විසින් මරා දැමුවා යයි කියන තරුණයාගේ බිරිඳට දැන් අත්වී ඇති ඉරණම. පොලිසියට විරුද්ධව ප්‍රකාශ දුන් තරුණයක් බොහොමයක් මත කුඩු ළඟ තබාගත්තා යයි නඩුවලට පැටලී ඇති බවත් දැනගන්නට තිබෙනවා. මාර්ග නීති ආරක්ෂා කරනවා වෙනුවට සැඟවී සිට වරද කරනතුරු බලා සිට දඩ ලියන ගමන් අනතුරු වලක්වන්නට පාරේ පිරිත් කියන පොලිසියකින් මීට එහා ගිය දෙයක් බලාපොරත්තු වීමත් විහිළුවක්. පොලිසිය හැමවිටම පොලිසියේ වැරදි වසමින් ආරක්ෂා කරනවා. වෛද්‍යවරු හැම විටම රෝහල්වල වැරදි වසමින් රෝහල් සේවකයන් සහ වෛද්‍යවරුන් ආරක්ෂා කරනවා. ගුරුවරු සෑම විටම පාහේ පාසල් වල සිදුවන අකටයුතුකම් වසමින් ගුරුවරු ආරක්ෂා කරනවා. විශ්වවිද්‍යාල ආචාර්යවරු හැම විටම පාහේ විශ්වවිද්‍යාල ආචාර්යවරු ආරක්ෂා කරනවා. යහපාලනයක් සඳහා පත්වූ ජනපතිවරයා කියන්නේ වංචා දුෂණ හෙළිකරන්නේ අලුත් පක්ෂයක් පිහිට වුවොත් බවයි. මුළු රටේම ක්‍රමය අතිශය දුෂණය වෙලා. මේ විදියට මේ රාජ්‍යය කඩා නොවැටී කොතරම් දුර යන්න පුලුවන්ද කියන එක අනාගතය පවසාවි.

හැමෝම උත්සහ කරන්නේ මහා සංස්කෘතියකට මුවාවෙමින් හොරෙන් වැරදි කරන්න. මේ රෑ දනියෙල් දවල් මිගෙල් කතාව මේ ගීතයේ හොදින් විස්තර කෙරෙන්නේ,

ගමේ ගැටවු කරබාගෙන උන්නාට,
විසේ නැග්ග නාකිත් පිල උඩ රෑට,
නෙලා ගනින් යයි කප්රුක පිදුවාට,

ඉනේ රෙද්දමයි හිටියේ හරහාට!!



දුප්පත් නුගත් මිනිසුන් සදාකාලිකව පාගා තබාගනිමින් තමුන්ගේ බලය රැකගන්නට හදන මේ සමාජයේ මීට වඩා සාධාරණයක් දකින්නට ලැබේ යයි සිතන්නට අමාරුයි.  


11. අඩු කුලේ කියාලා අසරණයා

අද වන විට රටේ කුල භේදය බොහෝ විට අඩු වී ගොසින්. නමුත් ඒ වෙනුවට මේ රටේ දැන් මතුව තිබෙන්නේ නිලධාරීවාදය. උසස් පෙලින් රාජ්‍ය විශ්විද්‍යාලයකට යන්න බැරිවුණ මිනිසුන් මෝඩයන් සේ සලකමින් සදාකාලිකව නුගතුන් ලෙස තැබිය යුතුය කියා කියන මිනිසුන් මම අද සම කරන්නේ එදා අඩු කුලේ කියාලා අසරණයා මැඩලන්න හදපු වසලයන්ටයි. වංශයෙන් හෝ කුලයෙන් බමුණෙක් හෝ වසලයෙක් නොවෙනවා වගේම, උසස් පෙළ ප්‍රතිඵල වලින් පමණක් මිනිසෙක් උගතෙක් හෝ මෝඩයෙක් නොවෙන බව මගේ විශ්වාසයයි.




පුහුමානය හර්දේ පුරවන්නේ දස පාප ක්‍රියාවේ පැටලෙන්නේ,
යුතුකම් සුසිරි මග නොමදන්නේ ඔහු නොවේද මේලෝකේ වසලයා!!

එදා රදලයන් සේ අද හැසිරෙන නිලධාරීවාදී වසලයන්ට අදටත් මේ ගීතය වලංගු බවයි මම සිතන්නේ. 



12. වලා අතුල සිරි යහනේ


දල රල පෙළ ටෙලි නාට්‍යයේ අඩංගු වුන මේ ගීතය මම මුලින්ම අහන්නේ විශ්විද්‍යාලයේ පළමු වසරේ ඉන්න කාලේ සාදයකදී අපේ ජ්‍යෙෂ්ඨයෙකුගේ කටහඬින්. එහි ශෛලියට මෙන්ම සංගීතයට මම බොහෝ සෙයින් කැමතියි.

හෙටක් ගැන යමක් නොදකින 
හෙටක් තිබේදැයි නොසිතන 
කෙනෙක් මධූ  විතක් තොල් අග
තවර ගන්නවා !!





හෙටක් ගැන යමක් නොදකිමින්, හෙටක් තිබේදැයි නොසිතමින් මධුවිත තොල් අග තවරාගන්න ඉන්ද්‍රචාප කුමාරයා ගැන කියවෙන; මා සතුවද ඇති සමහර චරිත ලක්ෂණ වලට ඇති කැමැත්ත නිසා මම ඊට බොහෝ ප්‍රිය කරනවා.


මම කැමති ගීත බොහෝ තිබෙන නමුත් මම කැමතිම ගීත ලෙස මෙම ගීත 12 මට තෝරා ගත හැකිය. අවස්ථාවන් තිබුනද අවශ්‍ය විටදී පමණක් ඒ අවස්ථාවන් යොදාගැනීම මම ගුරුවරුන්ගෙන් ලැබූ පුහුණුවයි. ගී 16 තේරීමට ඉඩ තිබුනද මම කැමතිම ගී 12 තෝරා ගැනීමෙන් මම සෑහීමට පත්වෙමි. 



40 comments:

  1. විරහ වේදනාව ගැන මට හැගීමක් නෑ මගේ දීර්ග කාලීන පළමු ප්‍රේමය හිමි වුණ නිසා. ඒත් මේක කියවනකොට අර සාමාන්‍ය පෙළ පංතියේ හිටිය අහිංසක කොළුවා ගැනනං සෑහෙන්න දුක හිතුනා. ඇත්තමයි. ඒක ඒ තරම් සංවේදීව ලියලා තියෙනවා

    ReplyDelete
    Replies
    1. මම උසස් පෙළට එන්න කලින් ප්‍රේමය ගැන බොහෝ පාඩම් ඉගෙනගෙන තිබුණ නිසා හොඳට ගියා කියලයි මම හිතන්නේ. සමාන්‍යපෙළ කාලේ බොහොම දක්ෂ වුන කොළු ගැටවු උසස්පෙලදී ආදරේ කරන්න ගිහින් තමුන්ගේ අනාගතෙත් අඳුරු කරගෙන ගෑණු ළමයාගේ අනාගතෙත් අඳුරු කරපු අවස්ථා ගොඩක් මම දැක තිබෙනවා. සාමාන්‍ය පෙළ කාලේ වෙනකොට කලහකාරයෙක් විදියට ප්‍රසිද්ධ වුණ මම පළමු පශ්චාත් උපාධිය ඉවරවෙනකොට බොහොම වගකීම් සහිත පරිණත තරුණයෙක් විදියට ප්‍රසංශා ලැබුවේ බොහොමයක් දිශා වලින් අධ්‍යාපනයට පින්සිද්ධ වෙන්නයි කියන එකයි මගේ අදහස.

      මම මේ ලිපිය ලිව්වේ ඊයේ හැන්දෑවේ අපේ ලැබ එකේ තනියම ඉදගෙන ඔය ගීත අහන ගමන් නිසා මම හිතුවාට වැඩිය සංවේදී ලෙස ඒවා ලියවෙන්නටත් ඇති. ඒ ගීත අහනවිට දැනෙන හැගීම වසර 15 කට පසුවත් වෙනසක් වී නැති බවයි මට හිතෙන්නේ.

      Delete
  2. මම කැමති ජපන් සින්දු වලින් දෙකක් දමන්නම්.
    1. SMAP ලගෙ "සෙකයි නි හිතොත්සු දකෙ නො හනා"
    https://www.youtube.com/watch?v=MdfPGiwJCDY

    2. නකෂිමා මියුකිගෙ "ජිජෝ හොෂි"
    https://www.youtube.com/watch?v=v2SlpjCz7uE

    Link එක කෙලින්ම දාන ට්‍රයි කලා ඌ බෑ කියනවා.

    ReplyDelete
    Replies
    1. SMAP ලගෙ "සෙකයි නි හිතොත්සු දකෙ නො හනා

      නකෂිමා මියුකිගෙ "ජිජෝ හොෂි"

      බොහොම ස්තුතියි මිත්‍රයා!! ස්පෑම් එකේ තිබුන. ඔන්න මම ලින්ක් දැම්ම.

      ජපන් තියෙන කොම්පුටර් එකක් ද පාවිච්චි කරන්නේ ඔබ ? සමහරවිට ඒවා ස්පෑම් වලට යන බව මම දැකල තියෙනවා.

      මම ගොඩක් කැමතියි සයුරි ඉෂිකව ගේ "ඕසක ශිගුරේ" ඒ වුනාට ඉංග්‍රීසි වචන තිබුන නිසා නගර-ගව දැම්මේ.

      Delete
  3. බොහොම හොඳයි. ඔබේ ගීත 16 වෙනසක් තියනවා. ඒ තමයි ඉංග්‍රීසි ගීයක් ඇතුලත් කිරීම සහ මා ඇතුළුව මෙතෙක් කවුරුවත් නොතේරූ සෝමතිලක ජයමහ ගේ ගීතයක් මෙන්ම,පැරණි ගායක ඒ.ජේ.කරීම් ගේ ගීයක් ඇතුළත් කිරීම. (ඔබ ගායකයාගේ නම සඳහන් කර නැහැ)

    ReplyDelete
    Replies
    1. මම සාමානයෙන් ලියන සම්භාව්‍ය ආකෘතියෙන් බැහැරවී "කැෂුවල්" ලිපියක් ලියන්නට සිතු බැවින් ගායකයාගේ, පද රචකයාගේ, හෝ සංගීත නිර්මාපකයාගේ නම් විශේෂයෙන් සදහන් නොකලෙමි. මගේ තේරීම් වලට ඉංග්‍රීසි හා ජපන් ගීත දෙකක් ඇතුලත් කලෙමි.

      වෘතීයමය අඹු සැමියන් දෙදෙනෙකු අතර ඇතිවන තරඟයක් පවුලටද බලපාන හැටි ගැන කියන "අභිමාන්" චිත්‍රපටයේ ගීත වලට මම බොහෝ ප්‍රිය කරමි. මේ අඹු සැමියන් දෙදෙනෙකු අතර ඇතිවන තරඟය ඉතා පරෙස්සමෙන් ජය-පරාජය බෙදාගත යුතු එකක් බව සිතන නමුත්, හින්දි ගීත තේරීමට තවත් අයෙකුට ඉඩක් තැබීමට සිතා ඒවා මේ ගීත 12 ට ඇතුලත් නොකලෙමි. මේ රැල්ල අවසන් වනතුරුත් ඒවා ගැන කතා නොවන්නේ නම් ඒවා ඉතිරි ගීත 4ට ඇතුලත් කිරීමට බලාපොරොත්තු වෙමි.

      ඔබේ අගය කිරීම මට විශාල ධෛර්යයක් බව පැවසීමට මැලි නොවෙමි.

      Delete
    2. අපි පාසල් වයසේදී සහ තරුණ වයසේදී සමහරවිට දෙතුන් වතාවක් බැලු, අභිමාන් වර්ගයේ හින්දි චිත්‍රපටි සීයක් පමණ සහ කව්බෝයි, ජෙම්ස්බොන්ඩ්, දෙවැනි ලෝක යුද්ධය පසුබිම් කරගත් චිත්‍රපටි, සීයක් පමණ බාගෙන, ඩීවීඩී වලට දමා පණමෙන් රැකගෙන සිටිමි.

      Delete
  4. සුන්දර ගී කිහිපයක්.මං හිතාමතාම සිංහල ගීතවලට විතරක් සීමා වුණා මගෙ ලිස්ට් එකේදි.පැරණි හින්දි ගිත සහ ඉංග්‍රීසි ගීත එක් කරන්න ගියා නම් ලිස්ට් එක 16න් නවත්වන්න වෙන්නෙ නෑ..

    ReplyDelete
  5. මගේ කොමෙන්ටුව කැපී ඇති සෙයකි.

    ReplyDelete
    Replies
    1. ස්පෑම් එකේ තිබුන. ඔන්න මම දැම්ම.

      ජපන් OS තියෙන කොම්පුටර් එකක් ද පාවිච්චි කරන්නේ ඔබ ? සමහරවිට ඒවා ස්පෑම් වලට යන බව මම දැකල තියෙනවා.

      Delete
    2. නෑ මම දැම්මෙ ඉන්ග්ලිෂ් එහෙකින්.
      Thank you, Anyway

      Delete
  6. ඔබෙ මේ තේරීම් අතරින් මගෙ හිත වඩාත් නැවතුනේ "මේ ගඟ මේ දුරු කතර ගෙවා" ගීතය ලඟ..වෙහෙස දැනෙන මේ ජීවිතේ හිත් නවාතැන් පොළවල් ලඟ නැවතෙන්නේ හේතුවකට කියලා මම විස්වාස කරනවා.

    කෙන්කුයුෂා, ඔබේ තේරිම් අන් අය එක්ක කරට කර.. හැමෝම ඉතා හොඳ ගී රසිකයන් වීම හිතට සතුටක්...

    ReplyDelete
  7. කෙන්කියුෂා ගැන හිතාගෙන හිටි වැරදි වැටහීමක් නැති වෙන්න මේ පෝස්ට් එක ඉවහල් උනා.. හැක්.. පෞද්ගලික දේ කතා කරන එක සමාර වෙලාවට වැදගත් වෙනවා.. මොකද එතකොට බොහෝ සෙයින් සාමාන්‍ය සේවරූවයට සමාන රූපයක් හිතින් මවාගන්න පුළුවන්.. දැං අර විචා අංකල් ගැන මං හිතන් හිටියේ හෙන පත උස මහත පුද්ගලයෙක් කියල නේ. නමුත් පින්තුරේ දැක්ක ගමන් මං හොල්මන් උනා. අඩේ කළු කැත බඩ මහත අංකල් සීයා කෙනෙක් නේද කියලා. හැක්..


    මම මේ රැල්ලට තාම අහු උනේ නෑ.. හැබැයි රැල්ල ගහන්න පටන් ගත්ත වෙලාවා ඉදලම නං දැනගෙන හිටියා. ජය

    ReplyDelete
    Replies
    1. මොකක්ද අප්පේ දේශකයා ඒ වැරදි වැටහීම ? කැමති නම් කියන්න !!

      Delete
    2. මොකටද අනේ හරිගිය හිත පාරගන්නේ.. හැක්..

      Delete
  8. තේරූ ගී අතර කියූ කතා අනුව පොදු අත්දැකීම් මත පදනම්ව පොදුවේ කැමති ගී ඇතිබව දැනුනා..අතීතයට හිත ඉගිලිලා ගියා නොදැනුවත්වම..
    ජයවේවා..!!

    ReplyDelete
    Replies
    1. ගොඩක් ප්‍රදේශ බැලුවම සමජාතීය සමාජයක් තියෙන අපේ රට වගේ පුංචි රටක මිනිස්සුන්ට සෑහෙන පොදු අත්දැකීම් තියෙන බව මටත් හිතෙනවා.

      විශේෂයෙන් ප්‍රේමය ගැන මම හිතන්නේ.

      Delete
  9. මම හිතන්නේ විදේශීය භාෂා වල සින්දු තිබ්බ පලවෙනි පොස්ටුව.

    බොහොම සන්තෝසයි.

    මගේ නම් හිත ගත්තේ අප්සරාද සිල්වා ගේ "ඉවාන් පවුලුෂා " සින්දුවයි.

    ReplyDelete
    Replies
    1. ජපානෙට ආපු මුල් කාලයේ ඔය එන්කා කියන ජාතියේ සින්දුවක් මුලින්ම අහම්බෙන් ඇහුණාම මට ලොකු අසාවක් ඇතිවුනා ඒ සින්දුවලට. මට හිතුනේ ඒවා ඔපෙරා වගේ ජාතියක් කියල. පස්සේ ඒ මොනවද කියල සොයාගෙන යනකොට පස්සේ තමයි ඒවගේ නම දැනගත්තේ. චුට්ටක්වත් ජපන් භාෂාව දන්නෙත් නෑ ඒ කාලේ.

      ටයිටැනික් සින්දුව නම් ඉතින් අපේ සමවයස් වල අයගේ හිත්වලට බොහොම තදින් කාවැදුණු එකක් කියලයි මම හිතන්නේ.

      ඉවාන් පවුලුෂා ගැන නම් කියන්නේ තිබෙන්නේ අප්සරාගේ කටහඬින් ප්‍රියන්ත ඩිරෙක්ස් ගේ තනු නිර්මාණ හැකියාවෙන් සහ චාරුක සුරවීරගේ පදරචන හැකියාවෙන් එවැනි තවත් නිර්මාණයක් බිහිනොවීම මහ අපරාදයක් බවයි.

      Delete
  10. සින්දු රැල්ලේ මෙතෙක් බලපු බ්ලොග් පෝස්ට් වලින් සින්හල හැර වෙනත් භාෂා වලිනුත් ගීත තෝරා තිබුනේ මේ බ්ලොග් එකේ විතරයි.ඔබේ තේරීමෙන් මම වඩාත් කැමති ඔබ එන්න සහ ටයිටැනික් ෆිල්ම් එකේ ගීතයට.ඒ කාලේ මේක පිස්සුවෙන් වගේ ඇහුවා.

    ReplyDelete
    Replies
    1. ඔබේ තේරීම් වලින් නම් කැමතිම කඳුල නිවන්නම් සින්දුවට.

      ටයිටැනික් නම් ඉතින් අපේ ඒ කාලේ ජීවිතේ හා සමයි නේ ඉතින්.

      Delete
  11. පළමුවෙන්ම රැල්ලෙන් බැහැරව විදේශීය ගීත තේරීම ගැන මගේ බලවත් විරෝධය ප්‍රකාශ කරනවා. මොකද සිංහල ගීත අතරින් තෝරනවා කියන අදහස තමයි රීතිය වුනේ. ඒත් කෙන්කියුෂා තෝරපු ගීත වලට කැමතියි. විදේශීය ගීත තේරුවොත් අභිමාන් වල ගීත මුලින්ම එන එකක් මගෙත්.කෙන්කියුෂා ඉන්නේ ජපානේ කියන අදහස මට මුල ඉඳන්ම තිබුණා. ජපානේ රිසර්චර් කෙනෙක්. කෙන්කියුෂා කියන්නෙත් ඒකනේ. අර ඒලෙවල් කාලේ ආදරේ වගේ ඒවා අපි හැමෝටම තිබ්බ කියල හිතනවා. පස්සේ ලියන්න ඕනේ.
    සින්දු ටික හොඳයි කියල තමා කියන්න තියෙන්නේ. සිංහල සෙට් එකම මම කැමති ඒවා.
    මෙන්න මම කැමති ජපන් ගීතයක්. විරහ ගීයක්.
    A stream of tears' ( Nada sousou)

    ReplyDelete
    Replies
    1. ඇත්තටම හරියටම උච්චාරනනය කෙන්ක්‍යුෂා. ඒ වුනාට සිංහලෙන් ජපන් ජපන් වචන ලියද්දි "ක්" වෙනුවට සාමාන්යෙන් "කි" ලියන නිසා තමයි කෙන්කියුෂා වුනේ.

      ඒ ආදරේ තිබුනේ 8 වසරේ ඉදලා ඕ ලෙවල් වෙනකන්. ඔය සිද්දිය වුනේ ඕ ලෙවල් ලියන්න මාස කීපෙකට කලින්. ඔය ටික ඒ ලෙවල් කාලේ වුණා නම් කැම්පස් එකට තේරෙන්න තියා එක විෂයක්වත් පාස් වෙන්න ලැබේවිද කියන්න අමාරුයි. ඒ ලෙවල් වලට එනකොට ප්‍රේමය ගැන බොහෝ පාඩම් ඉගෙනගෙන තිබුණ නිසා හොඳට ගියා කියලයි මම හිතන්නේ. සමාන්‍යපෙළ කාලේ බොහොම දක්ෂ වුන කොළු ගැටවු උසස්පෙලදී ආදරේ කරන්න ගිහින් තමුන්ගේ අනාගතෙත් අඳුරු කරගෙන ගෑණු ළමයාගේ අනාගතෙත් අඳුරු කරපු අවස්ථා ගොඩක් මම දැක තිබෙනවා. මේ වගේ බොහෝ දෙනෙකුට ජීවිතේ එක එක කාලේදී ජීවිතේ සමහර තැන් වල මෙවැනි අත්දැකීම් ඇති. ඒවගේ සාමාන්‍ය වැරදීම් නිසා උසස්පෙළ විභාගෙන් 3 පාරම වැටුණු දක්ෂ ළමයින්ට පුද්ගලික විශ්විද්‍යාලතුලින්වත් තවත් දෙවැනි අවස්ථවක් ගන්න ඉඩක් තිබෙන්න ඕනේ කියන එක මම විශ්වාස කරන්නේ.

      ඉයන්ගේ ලිපිය බැලුවහම එහෙම සීමාවන් දැක්කේ නැති නිසා මේ පොස්ට් ඒක ලියද්දී මගේ අදහස වුනේ ඒක මුලින් ගීත තේරු අය නොකළ නිසා පස්සේ අයත් එහෙම නොකලා වෙන්න ඇති කියල.

      අජිත්ගේ තේරීම් ටික බලන්න බැරිවුනා; බලන්න ඕනේ හෙටවත්.

      ජපන් සින්දුවේ ලින්ක් එකට බොහොම ස්තුතියි. ඒක වික්ටර් එන්ටර්ට්‍රෙන්මන්ට් කියන එකෙන් ඒක ජපානේ බ්ලොක් යු ටියුබ් කරලා තියෙන නිසා මට ඒක බලන්න බැරි බවයි පෙන්නේ. එත් කවර් එකක් බැලුවා. ලස්සන සින්දුවක්.

      Delete
    2. ඒක මම විහිළුවට කීවේ. කෙන්ක්‍යුෂා තම ඉංග්‍රීසියෙන් කියවෙන විධිහත්. මම පුද්ගලික ඉගෙනීමට විරුද්ධ නොවෙන්නෙත් ඔය වගේ හේතු ටිකක් තමා . මම ලියක තියනවා බ්ලොගේ ඒවානම්. ජපන් සින්දු වලට මමත් කැමතියි. මම හිතන්නේ සින්දු කියන අයගේ රුවත් බලපානවා ඇති. ඔය කෙන් දාල තියන සින්දුව හැරියට් සිංහල සින්දුවක් වගේ. නීලා වික්‍රමසිංහ මතක් වුණා .

      Delete
  12. නිරංජලාගෙ " මේ හැටි දුර පියමංකරලා ඇයි මම ඔබ ලඟ නතර වුනේ.." බොහොම කාලෙකින් ඇහුවෙ..ස්තූතියි

    ReplyDelete
    Replies
    1. කියවීමට සහ ගීත ඇසීම වෙනුවෙන් ඔබටත් බොහොම ස්තුතියි.

      Delete
    2. indumathie adikariAugust 26, 2016 at 2:45 PM

      සමාන අත්දැකීම් සමඟ සුන්දර ගීත කීපයක් රස වින්දා .විදෙස් ගීතය පිළිබඳ අදහස අපුරුයි.ඉන් විවිධත්වයක් එක්වුණා .අපට ජපන් ගීත අහන්න ලැබෙනවා අඩුයිනේ .කවුරු වුණත් වෙනත් භාෂා වලින් ගැයෙන ගීත මෙලෙස හඳුන්වා දෙනවානම් අප වැනි දුහුනන්ට එය ආශීර්වාදයක් .එසේ වේවා වේවා !

      Delete
    3. indumathie adikari,

      බොහොම ස්තුතියි. එන්කා වර්ගයේ ජපන් ගීත බොහොමයක් අනතර්ජාලයේ තිබෙනවා. ජපන් ගීත වලට මමත් බොහොම කැමතියි.

      Delete
  13. නිරංජලාගෙ " මේ හැටි දුර පියමංකරලා ඇයි මම ඔබ ලඟ නතර වුනේ.." බොහොම කාලෙකින් ඇහුවෙ..ස්තූතියි

    ReplyDelete
  14. ස්තුතියි කෙන්කියුෂා,
    ඔබේ දිගු කමෙන්ටුවට. මමද ළඟදීම බ්ලොග් එකක් ලිවීමට අදහස් කරමි.
    මේ ඔබේ රසවින්දනය පිණිසයි.
    https://www.youtube.com/watch?v=04p15tMl68I

    ReplyDelete
  15. මේ ගීත බොහොමයකට මමත් කැමතියි. විශේෂයෙන් “ඔබ දුටු ඒ මුල්දිනේ“ ගීතයට. විනේ කටින උන් ගීතයට නම් ගීතයක් හැටියට මම ඒ තරම් ප්‍රිය නෑ. “නගර-ගව එන්කා“ “වලා අතුල සිරි යහනේ“ ගීත මම අහලා නෑ. හොද කලෙක්ෂන් එකක්.

    ReplyDelete
  16. ඒ ජපන් ගීතය නම් හරි අපූරුයි... තව ඒ වගේ ඒව අහනවා..

    ReplyDelete

මගේ පරමාර්ථය තවත් අයෙකුට කියවීම සදහා ලිවීමයි. කියවන්නන්ගේ අදහස් දැනගැනීම ඔවුන් සදහා වඩාත් හොද ලියවිල්ලක් ලිවීමට මට හැකියාව ලබාදේ.