වඳ කරන දොස්තරලා

මම පහත ලිපිය ලියුවේ 2017/03/06 වෙනි දිනයේදී ය. ඒ වන විට ඒ ගැන වෛද්‍ය සභාව හෝ වෙනත් කිසිවෙකු මේවාට එරෙහිව කතා කලේ නැත. සැමවිටම වෛද්‍යවරු නිවැරදි විය. එවකට සමාජයේ තිබුනේ ස්ථර වශයෙන් තිරස් බෙදුමකි. එහි පහල සාමාන්‍ය මිනිසුන් ගැහැනුන් සිටි අතර වෛද්‍යවරුන් සිටියේ ඉහළිනි. ඒ වකවානුවේ දී වෛද්‍යවරුන් සිදු කරන ලද අසික්කිත ක්‍රියාවන්ට එරෙහිව හඬ නැගීම සැලකුනේ දොස්තර හෝ මැවිසුරු වීමට නොහැකි වූ හීනමානයකින් ඇතිවූ වෛරයක් පිරිමසීමක් ලෙසයි. නිදහස් අධ්‍යාපන වරප්‍රසාදය වැරදියට වටහාගෙන සිටි  සිංහල බ්ලොග් අවකාශයේ සමහර නොදියුණු මානසිකත්වයෙන් යුතු පිරිස් දැරුවේද එම අදහසයි.එකල සිසේරියන් සැත්කමකින් පසුව කාන්තාවකට දරුවන් නොලැබීම ගැන පැමිණිලි කලේ නම් ඇය සියලු දෙනාගේ ගර්හාවට ලක්වෙනවා නියතය. 

නමුත්, අද වනවිට සමාජය බෙදී සිටින්නේ සිරස්වය. වෘත්තීය මදෙකට පසෙකලා ජාතීන් වශයෙන් ඇතිව තිබෙන බෙදීමේදී වෛද්‍යවරුන්ගේ අසික්කිත ක්‍රියාවන් කොන්දේසි විරහිතව සාධාරණීකරණය කල වෛද්‍ය සංගම් වැනි සංවිධානද වෙනත් ජාතික වෛද්‍යවරයෙකු කර ඇතැයි කියන අසික්කිත ක්‍රියාවන්ට එරෙහිව කතා කරමින් සිටී. 

නිසි ක්‍රමවෙධයන් සහ නීතියට වන්දනා මාන කිරීම් වෙනුවට නොයෙකුත් වෘත්තිකයන්ගේ ද දේශපාලකයන්ගේද දෙපාමුල වැඳ වැටීමේ අදීනව ගැන මෙය කදිම උදාහරණයකි. අදීන ගෞරවනීය මිනිසෙකු තැනීම අද රටේ පළමු අවශ්‍යතාවය වේ. 

මම 2017/03/06 ලියු ලිපිය පහතින්.  

2017/03/06
වෛද්‍යවරුන්ගේ දරුවන්ට සුපිරි පාසල් ඉල්ලමින් වර්ජනය කල දින ෆේස්බුක් හි පවත් අදහසක් මට මතක තිබේ. යම් අයෙකු උපහාසයෙන් කියා තිබුනේ "හෙට අනිද්දා වන විට වෛද්‍යවරුන්ට හැරෙන්නට වෙනත් අයට දරුවන් ලැබීමටද වෛද්‍යවරුන් ඉඩ නොදේවි" යන බවයි. එය එදා උපහාසයෙන් කියා තිබුනද අද විට නම් එය සත්‍ය විය හැකි මානයට පැමිණ තිබේ.

දඹුලු රෝහලේ දරුවන් බිහි කරන මවුවරුන්ට බලහත්කාරයෙන් උපත් පාලන ලුපයක් හෝ උපත් පාලන ඖෂධ අඩංගු උපකරණයක් හෝ ශරීරයට ඇතුලත් කර නොගෙන එම මවුවරුන්ට රෝහලෙන් පිටව යාමට ඉඩ ලබානොදීම මේ වන විට සිදුවී තිබේ. එසේ කිරීමට කිසිදු වෛද්‍යවරයෙකුට/වරියකට අයිතියක් නැති අතර ශිෂ්ඨ සම්පන්න මිනිසුන් වෙසෙන රටක් නම් මේ අය මේ වන විට සිටිය යුත්තේ බන්ධනාගරයෙයි.

ජනගහන පාලනයට අවශ්‍ය විද්‍යාත්මක නීති සැකසිය යුත්තේ ඒ සඳහා දැනුම ඇති විද්වතුන් සහ මහජන සහභාගීත්වයෙන් මිස ම්ලේච්ච ක්‍රම වලට නොවේ.

"වෛද්‍යවරුන්/වරියන් නොවෙන අයට ලිංගිකව එක්වීම අනවශ්‍ය බව කියමින් ශ්‍රී ලංකාවේ මිනිසුන්ට chemical castration ඖෂධ බලෙන් ශරීරගත කරනු ඇතැයි" අද කෙනෙකු කිවහොත් එය හොඳ විහිළුවකි. නමුත්, මේ සිදුවන් ලෙස නම් හෙට දිනයේදී  එයටද යම් සත්‍යතාවයක් නොලැබේ යයි කිව හැකි නොවේ.

වෛද්‍යවරු නොවෙන අප ඔවුන්ගේ වැරදි සොයමින් ද්වේශයන් ඔවුන් හෑල්ලු කරන බව මේවා ගැන කතා කරනවිට නැගෙන චෝදනාවකි. නමුත්, මට සිතෙන්නේ නම් වෛද්‍යවරු සමග ද්වේශයන් ඔවුන් හෑල්ලු කිරීමට අවශ්‍ය වෛද්‍ය සභාවට සහ වෛද්‍ය සංගම් වලට බවයි. එසේ නොවේ නම්, ශ්‍රී ලංකාවේ වෛද්‍යවරුන් යනු ශිෂ්ඨ මිනිසුන්ගේ ගැහැණුන්ගේ පුද්ගලිකත්වයට ගරු කිරීමට නොදන්නා ගෝත්‍රිකයන් බවට ලෝකයා හමුවේ අපේ වෛද්‍යවරුන් හෑල්ලු වෙනතෙක් උකටලීව බලාසිටින්නේ ඇයිදැයි මට නොතේරේ. 

සමහර වෛද්‍යවරුන්ගේ මෙවැනි නීච අශීලාචාර ක්‍රියා වලට එරෙහිව නීතිය ක්‍රියාත්මක කර අපේ වෛද්‍යවරුන්ගේ ගරුත්වය රැකගැනීමට කටයුතු නොකර, මිනිසුන් වෛද්‍යවරුන් යන වචනය ඇසෙන විටද  කෙල ගසන දිනය පැමිණෙන තෙක් මෙසේ උකටලීව බලාසිටින ශ්‍රීලංකා වෛද්‍ය සභාවට අපේ වෛද්‍යවරුන් සමග සමග කොයිතරම් ක්‍රෝධයෙන් නම් තිබියයුතුද ?

ඥානසාර හිමිට ලැබුණු ජනපති සමාව

කිසියම් සිරකරුවෙකු ජනපති සමාව ලැබීමට තරම් යහපත් කල්ක්‍රියාවක් පෙන්නුම් කර ඇතිනම් එය බන්ධනාගාරයේ විශෝධන ක්‍රියාවලියේ සාර්ථක බවට සාක්ෂියකි. මෑතදී ආචාර්ය උපාධිය සඳහා ඉගෙනීමට කටයුතු කරන සිරකරුවෙකු පිළිබඳවද වාර්තා වී තිබිණි. මගේ මතකය අනුව එකී සිරකරුවා වාස් ගුණවර්ධන සම්බන්ධ ශියාම් නඩුවේ වරදකරුවෙකි. ඥානසාර හිමිටද යහපත් කල්ක්‍රියාවෙන් සීටීම හේතුවෙන් ජනාදිපති සමාවක් ලැබී තිබේ. එය සතුටට කරුණකි. කෙසේ වුවද මේ මොහොතේ පවතින දේශපාලන හා සමාජයීය තත්වයට මෙකී සිදුවීමේ බලපෑම ගැන මගේ පුද්ගලික අදහසක් දැක්වීම මගේ කෙටි ලිපියේ අරමුණ වේ.  

පාස්කු දින බෝම්බ ප්‍රහාරයෙන් පසු ඇති වූ තත්වය තවත් නරක අතට හැරීමට පෙර වලක්වා ගන්නා ලද්දේ අගරදගුරු ප්‍රසාදීන් වහන්සේගේ සක්‍රිය මැදිහත් වීමෙනි. මේ වෙනුවෙන් උන් වහන්සේට සියලු ආගමිකයන්ගේ හද පිරි ආදරය ගෞරවය හිමිවිය. මේ මොහොතේ අගරදගුරු ප්‍රසාදීන් වහන්සේගේ වචනය රටේ දේශපාලනයට ඇතිකළ හැකි බලපෑම ඇති මහත්ය. නමුත් උන් වහන්සේ දේශපාලකයාට වුවමනා දේ නොකරන බව මෙන්ම දේශපාලනය ද නොකරන බව පැහැදිලිව  සඳහන් වී තිබේ. අනෙක් අතට බෝම්බ ප්‍රහාරයෙන් සති 3 කට පසුව ඇති වූ තත්වයට දේශපාලන හස්තයන් සම්බන්ධ බව මේ වනවිට බුද්ධි අංශ වාර්තා  පවසන බව මාධ්‍ය හෙළිදරවු කරමින් පවතී.  කෙසේ වුවද එම තත්වය ඉතාම සාර්ථකව මැඩපැවැත්වීමට පොලිසිය සහ හමුදාවන් සමත් විය. එමෙන්ම මේ වනවිට ජන ජීවිතය සාමාන්‍ය අතට හැරෙමින් පවතී.  අනෙක් අතට බෝම්බ ප්‍රහාරයෙන් සති 3 කට පසුව ඇති වූ කලබලකාරී තත්වය දේශපාලන කුමන්ත්‍රණයක් වුවා නම් එය අසාර්ථක වූ බව පැහැදිලිය. 

මේ මොහොතේ අගරදගුරු ප්‍රසාදීන් වහන්සේගේ වචනයට රටේ දේශපාලනයට ඇතිකළ හැකි බලපෑම අඩු කිරීමට වෙනත් ආගමික නායකයෙකුගේ සාමාජයීය පැවැත්ම අවශ්‍ය නම් එයට ඥානසාර හිමි නොසුදුස්සෙක් නොවේ. එමෙන්ම ඥානසාර හිමිගේ පසුගිය කාලයේ හැසිරීම අදේශපාලනික ද නොවේ. 

ඒ හැරෙන්නට බෝම්බ ප්‍රහාරයෙන් සති 3 කට පසුව ඇති වූ තත්වය යටතේ මහසෝන් බලකාය ආදී මුග්ධ අන්තවාදී සංවිධාන වල කුමන්ත්‍රණකාරී කට්ටඩි නායකයන් මේ වනවිට ඉන්නේ බන්ධනාගරයේය. ඒ තත්වය නිර්මාණයට දේශපාලන හස්තයක බලපෑම තිබුණි නම් එම හස්තය පරාජය බාරගෙන පසෙකට නොවෙනු ඇති. බොදුබල සේනා  වැනි සංවිධාන පණගන්වා ඉහත කී අරමුණ ඉටු කරගැනීමට එහි නායකයන් අත්‍යවශ්‍ය සාධකයක් වෙනු ඇති. 

ඥානසාර හිමිට ලැබුණු සමාව දේශපාලනික බව මේ වනවිටද සමාජ මාධ්‍ය ඔස්සේ සාකච්චා වී ඇත. නමුත් ඉන් සමාජයට ඇතිබව බලපෑම සමාජයේ යහපත පමණක් උදෙසා හරවා ගන්නේ කෙසේද යන්න ගැන තවම සමාජ මාධ්‍ය අවශ්‍ය පමණට අවධානය යොමු කර නැත. මෙයින් ඇතිවිය හැකි අහයහපත් බලපෑමක් වෙතොත් එය වලක්වා ගත හැක්කේ මෙකී දේශපාලන ක්‍රියාවලිය ගැන අවධියෙන් සිටීමෙන් පමණි. 

  

   

Religion is something like sex : ආගම ගැන ජපන් කොළු ගැටයෙකු කී මසුරන් වචන ටික

මේවන විට ආගම් ගැන විවිධ වූ සාකච්චාවන් රට තුල පවතී. කෙසේ වුවද මුස්ලිම් පල්ලිවල ඉස්ලාම් ආගම අදහන ශබ්ධය ලවුඩ් ස්පීකරයෙන් අසන්නට අකමැති බව සමාජ ජාල ඔස්සේ පවසන බොහොමයක් දෙනෙකු පිරිත් වල ශබ්ධය උදේ හවස ලවුඩ් ස්පීකරයෙන් අසන්නට අවැසි බව සමාජ ජාල ඔස්සේ යෝජනා කරති. මා සිතනා හැටියට ආගම් වලට විශේෂිත වූ ළමා විවාහ, බහු භාර්යා ආදී වශයෙන් වුණ ජපානය වැනි දියුණු රටවල් කිසිසේත් ඉඩ නොදෙන නීති මෙරට ද අකුලා දැමීමට තිබෙන ලොකුම බාධකයක් වන්නේ ද මේ ආකල්පයයි. 

ආගම් වලට විශේෂිත නීති, විශේෂිත සැලකිලි නොලැබිය යුතුය යන ප්‍රගතිශීලී මතය හිර වෙන තැනක් මෙරට තිබේ. ඒ නම් තම ආගමට ලැබී ඇති නීතිමය ප්‍රමුඛ ස්ථානය ද එවිට අහෝසි වීම ඉවසීමට ඇති නොහැකියාවයි. සමාජ ජාල ඔස්සේ එකම රටක් එකම නීතියක් ඉල්ලන මිනිසුන්ම තම ආගමට ප්‍රමුකත්වයක් ද ඉල්ලති.  මෙහි ඇති නොගැලපීම ඔවුන්ට තේරෙන නමුත් නොතේරෙනවා සේ සිටිති. මෙය අමුවෙන්ම පවසන්නට ගොස් ඛේමාගේ කොළුවා හදාගත් අවුල අමතුවෙන් කිව යුතු නොවේ.


ආගම් ගැන මගේ සිසු ජපන් කොළුවාගේ මසුරන් වචන ටික වටින්නේ මෙතැනදීය.

I am a Japanese, I think........Religion is something like sex. We all have it. We all practice it. We all enjoy feeling of it. But, we do not publicly talk about how we do sex. The way we do sex. Or how my sex is better than yours ? Even though we all practice sex, we do it at a surrounded place. But we do not practice sex outside of that place. We do not talk about it publicly. We can not do sex forcefully.....It is a crime. It is totally your personal thing. It is all up to you. If you do not want, you may not practice any sex. To do sex or not, totally up to you. Your sexual behaviors also under the government law. You can not hurt anybody on behalf of your sexual pleasure. Religion is something like sex. You do it. But its your personal thing. And should not brought in to public.

ඌගෙ කැඩුණු ඉංග්‍රීසියේ තිබුණ වචන වල තිබුනේ ජපන් තරුණ පරපුර හිතන විදිය.

ඌගෙ කැඩුණු ඉංග්‍රීසි අපේ බොහොමයක් දෙනෙක් කොහොම තේරුම් ගනීවිද කියන එක නම් විශ්වාස නෑ. තේරුම්ගන්න පුළුවන් නම් අපතේ යන එකකුත් නෑ. 

නාගනන්දලාට පල්ලෙවත්තලාට දේශපාලනය කල හැක්කේ කලබල නොමැති, ත්‍රස්තවාදීන් නොමැති නිසංසල සුමට සමාජ වටපිටාවක පමණක් ද ?

රට තුල ඇතිවූ ත්‍රස්ත ප්‍රහාරය සමග ඇතිවූ වාතාවරණය තුල මීළඟ දේශපාලන නායකත්වයන් බලාපොරොත්තුව සිටි අයගේ හැසිරීම් තවම ප්‍රමාණවත් ලෙස විශ්ලේෂණය වී නොමැත. මෙම ලිපියේ අරමුණ ඊට ආරම්භයක් ලබාදීමයි!!!

රට තුල මුස්ලිම් ත්‍රස්තවාදීන් සිදු කළ මරාගෙන මැරෙන බෝම්බ පිපිරීම සමග රටම සෙලවීමට ලක්වී ඇති බව පෙනී යයි. එය දැන් යම් පමණකට තැන්පත් භාවයට පත්වෙමින් තිබුණත් එය කැළඹු භාහිර බලවේග සම්පූර්නයෙන්ම පහ කර දමන තුරු  ස්ථිරව තැන්පත් භාවයකට පැමිණේ යයි සිතන්නට අපහසුයි.

මේ සමග බොහෝ ප්‍රගතිශීලී සුදු කොකුන් ලෙස පෙනී සිටියවුන්ගේ කළු පිහාටු ප්‍රදර්ශනය විය. වගකිව යුතු රාජ්‍යතාන්ත්‍රිකයෙකු ලෙස විශ්වාසයක් තිබු රනිල් ඔහුගේ විශ්වාසය ඉතාම පළුදු කර ගත්තේය.ජනපතිවරයාගේ විකාරරූපී ක්‍රියාකලාපය අප්‍රසන්න විය. ඊට නොදෙවෙනි ලෙස ඔහුගේ සහචර මුග්ධ රාජ්‍ය නිලධාරීන්ද පෙනී සිටින ලදී. මෙවැනි හැසිරීම් වලට බලපෑ හැකි හේතු ඉදිරියේදී ඉදිරිපත් කිරීමට තබමි. එමෙන්ම පසුගිය දිනවල විපක්ෂනායක වරයාගේ ක්‍රියාකලාපය අසතුටුදායකය. ඔහු මීට පෙර විපක්ෂනායකයා වශයෙන් සිටියදී තංගල්ල බන්ධනාගාරයේ කැරැල්ල සංසින්දුවීමෙදී පෙන්වූ ප්‍රගතිශීලී භාවයවත් තවමත් මෙවර ඔහුගෙන් පෙන්නුම් වුනේ නැත. ජාතික ආරක්ෂාව ගැන නිතර දොඩමලු වෙන ජනපති සිරිසේන සමග ඒ වනවිට සමීපව කටයුතු කල විපක්ෂ නායක  රාජපක්ෂ මෙහිදී දේශපාලන ප්‍රකාශ කිහිපයක් ඉදිරිපත් කිරීමෙන් පමණක් නැවතුණි. එමෙන්ම ඉදිරි ජනපති අපේක්ෂකයෙකු වීමට බලා සිටින ගෝඨාභය රාජපක්ෂ මෙම සිදුවීම ඔහුගේ ජනපති අපේක්ෂකත්වය කල එලි බැස්සවීමට තිබු පවුලේ බාධක ඉවත් කර ගැනීමට යොදාගත් ආකාරය අසතුටුදායක වේ.

දේශපාලකයන් එසේ වුවද සන්නද්ධ හමුදාවන් තම ජනතාවගේ ආරක්ෂාවට අවශ්‍ය පියවර සුදුසුම ලෙස සූකෂමව ඉදිරියට හා පසුපසට ගනිමින් දක්වන ගතික ක්‍රියාකාරිත්වය අතිශය ප්‍රසංශනීය වේ. එමෙන්ම කතෝලික ආගමික නායකත්වය ඉතාම පරිණත ඉවසීම ප්‍රගුණකළ මානව දයාවෙන් යුතු සුදුසු මිනිසුන්ම එම නායකත්වයන් දැරියයුතු බවට මෑත කාලයේ ප්‍රභලම සාක්ෂිය සපයන ලදී.

මේ අතර ජනපති අපේක්ෂයන් වෙන බව ප්‍රකාශ කර ඇති නාගානන්ද සහ පල්ලෙවත්ත දෙදෙනා මෙම සිදුවීමේ සංකීර්ණම අවස්ථාවේදී පෙන්නුම් කල හැසිරීම ඔවුන්ගේ දේශපාලන සිහිනයේ තීරනාත්මක සාධකයක් වනු ඇත. ජනතාවගේ ආරක්ෂාව කඩවීම පිලිබඳ මුලික අයිතිවාසිකම උල්ලංඝනය වීම ගැන ඔහුගේ පෙත්සම සාමාන්‍ය වැසියෙකු ලෙස සලකූ විය ප්‍රසංශනීය වෙන නමුත් ජනපති අපේක්ෂකයෙකු ලෙස ජනතාවට නායකත්වය ලබාදීමට බලාපොරොත්තුවෙන නායකයෙකු ලෙස නාගනන්ද පෙන්නුම් කර ඇත්තේ ළදරු හැසිරීමක් පමණි. පල්ලෙවත්තගේ හඬ මෙතෙක් නොඇසුනි. දින ගණනකට පසුව නාගනන්ද පෙත්සම සමග එලි බසින්නේ සියලු දේ බොහෝ දුරට සාමාන්‍ය අතට හැරුණු පසුවය. රටක් වෙනස් කිරීමට බලාපොරොත්තු වෙන විකල්ප නායකයෙකු වීමට ඔහුට හැකියාවක් නැති බව ඔහුගේ හැසිරීමෙන් ඔහු පෙන්වූ බව මගේ නිගමනයයි. මෙයින් පෙනීයන්නේ නාගානන්ද සහ පල්ලෙවත්ත වැනි අයට දේශපාලනය කල හැක්කේ කලබල නොමැති, ත්‍රස්තවාදීන් නොමැති නිසංසල සුමට සමාජ වටපිටාවක පමණක් බවයි. මෙවැනි ගැටළු සහගත දේශපාලනික වටපිටාවක මෙවැනි දේශපාලනික නොදරුවන්ගේ හැසිරීම සිරිසේන-වික්‍රමසිංහ මෝඩ ජෝඩුවේ හැසිරීම පරදා යනු ඇති බවට වුවමනාවටත් වඩා සාක්ෂි ඔවුන්ම සපයා තිබේ. අගරදගුරු ප්‍රසාදීන් වහන්සේ පැවසු ලෙසම මෙම ත්‍රස්තවාදයේ මුලය මෙන්ම ඒවා හසුරුවන අයගේ ඉලක්ක තවම අපැහැදිලිය. කෙසේ නමුදු මෙම ත්‍රස්තවාදය රටේ මීළඟ දේශපාලන නායකත්වය තේරීම පිලිබඳ ඇති කරන ඇති විශාල බලපෑම නොවැලක්විය හැකිය. මගේ මතය නම් මේ දක්වා රටෙහි ජනපති වීමට බලාපොරොත්තු වෙන බව පවසා ඇති සියලුම දෙනා මෙම ත්‍රස්ත ප්‍රහාරය සමග ඇතිවූ වාතාවරණය තුල මේවන විට ඔවුන්ගේ හැසිරීම තුලින් තමතමන්ගේ අසමත් භාවය මුළුමනින්ම ප්‍රදර්ශනය කර ඇති බවයි.

මේ අනුව රටෙහි මීළඟ දේශපාලන නායකත්වය දරනු ඇත්තේ බොහෝවිට තවම දේශපාලන කරලියට නොපැමිණි කෙනෙකු විසින් විය හැකි බව මම විශ්වාස කරමි. එකී නායකත්වය ගැන යම් අනුමානයන් මා සතුව පැවතියද එම නායකත්වයන් මතුවීමට පෙර ඒ ගැන පුරෝකතනය ආචාර සම්පන්න නොවන බැවින් නිහඬ වෙමි.